Bosa ta bai casa!

Un temporada bunita di preparashon ta cuminza. Hunto boso ta prepara cada detaye di boso bruid. Boso bruid lo bira un dia special caminda boso lo celebra boso storia di amor cu boso sernan queri. 

Amor sin frontera

Amor ta trece diferente cultura hunto y no conoce frontera. Ki bunita lo ta si hunto nos por crea un ceremonia di bruid caminda tur hende ta disfruta y sinti nan mes na cas. Un ceremonia den cual tradishonan cultural y familiar lo wordo honra. Full na Papiamento, Hulandes of un combinashon di e dos lenguajenan aki.

Tin famia of amigonan queri cu no por atende boso bruid? Hunto cu boso mi lo percura pa nan por atende boso ceremonia matrimonial for di distancia. Asina famia of amigonan lew lo sinti hopi cerca ariba un dia asina special pa boso. 

Unico, personal y amoroso

Mi lo crea un ceremonia unico basa ariba boso storia di amor. Un ceremonia caminda mi ta percura pa duna tradishonan cultural of familiar cu ta importante pa boso un bunita lugar. Ki bunita lo ta si boso mes scirbi y declama boso promesa matrimonial pa otro? Asina mi ta crea hunto cu boso un ceremonia cu lo keda graba eternamente den boso curazon. 

E dia tan anhela

E dia di boso bruid boso ta lanta mainta cu e siguranza cu boso por bai disfruta di e dia sin limite. Presente of for di distancia? Tur boso ser querinan lo tey.

Kiermen di cu boso por bai disfruta di boso bruid for di comienzo te na final. Boso lo goza for di momento cu boso ta bisti boso panja di bruid, wak otro pa prome biaha, durante di e ceremonia, te na e ultimo baile na final di e fiesta....

Boso ceremonia matrimonial lo ta un celebracion bunita di boso amor .

Imagina

Boso a lanta na Hulanda, ta loco enamora di otro y (un di) boso tin 'roots' Arubiano of Antiyano. Cu un bon trabao, un bunita cas y un tremendo grupo di amigo, bida ta dushi na Hulanda. Boso amor ta sinti duradero y a bira tempo pa tuma e siguiente paso y drenta den enlace matrimonial! Famia y amigo ta bini hunto for di Aruba y Antiyas pa celebra boso amor. Importante pa boso ta cu parti di boso cultura lo forma parti di e ceremonia matrimonial.

Un soño a bira realidad

Durante e ceremonia matrimonial di mi miho amiga na Boneiru ta prome biaha cu mi a forma parti di un ceremonia matrimonial. Na e bruid ey ami a traduci e mensahe di e pastor pa e bruidegom y e invitadonan Hulandes. E experencia ey a sembra e deseo pa bira un trouwambtenaar profesional.

Pami ta algo masha fantastico pa crea un ceremonia matrimonial inolvidabel pa un pareha y nan invitadonan.

Pensando back ariba mi mesun matrimonio aki na Hulanda mi ta corda specialmente e momentonan  caminda e elementonan tradishonal di Aruba/Antiyas tabata visibel. Canticanan traducí na papiamento, e bolo preto pa invitadonan hiba cas y naturalmente e bailamento hunto cu mi famia y amigonan ariba tononan di musica Caribense y  Hulandes. Esaki ta locual mi ta desea pa cada pareha. Un fiesta di bruid sin limite cu ta pas cu cada bruid y bruidegom.

Ora nos cera conoci
Na momento cu boso tuma contacto cumi. Nos ta planea un cita pa cera conoci cu otro sin compromiso. Si ta posibel nos ta cera conoci personalmente. Pero si distancia of otro circumstancia no ta haci esey posibel, nos por planea un cita online.
Durante nos prome combersashon cu otro nos ta cera conoci cu otro. Boso ta contami algo over di boso mes, y con boso storia di amor a cuminza. E tabata amor a primera bista of no? Tambe mi lo kier sa con boso ta mira e ceremonia matrimonal di boso sonjo. Asina nos ta cera conoci cu otro na un manera informal, djis pa wak si tin un click entre nos.

Boso ta bisa SI

Si boso dicidi pa ami haci boso ceremonia matrimonial, nos ta traha un siguiente cita pa asina nos cera mas miho conoci cu otro. Mi lo puntra cada un di boso con boso storia di bida ta. Nos combersashon lo bira un 'trip down memorylane', un di e partinan mas dushi di mi trabao. Tambe mi lo combersa cu algun ser keri di boso pa nan tambe por dunami information over di boso. Information cu mi por huza ora cu mi bai scirbi mi speech pa boso ceremonia. 

Dos luna prome cu boso bruid mi ta pasa cerca boso pa nos palabra ampliamente con boso ceremonia matriomonial ta hinca den otro. Ki elementonan traditional nos ta laga forma parti di e ceremonia? Boso mes ta bai scirbi y declama boso promesa matrimonial? Cua famia y amigonan ta bai tin un rol activo? Naturalmente mi ta bai surprise boso un tiki tambe ariba e dia ey. 

Mucho gusto
Ami ta Donna van Heukelem-Kock. Naci y lanta na Hulanda for di mayornan Arubiano. E anhelo di mi mayornan pa bai Aruba back a pone cu nos a bai biba back na Aruba, caminda mi a pasa gran parti di mi  hubentud.

27 anja pasa mi a bini Hulanda back pa mi estudio. Door cu mi a biba un parti di mi hubentud na Hulanda mi  a adapta lihe y a forma mi grupo di amistad di diferente cultura. Asina mi a sinja aprecia diferente cultura. Tambe mi a ripara cu culturanan por enriqueze y enforza otro.

Na Hulanda mi a topa e amor di mi bida. Nos a casa y a wordo bendishona cu tres yui muhe. Hulanda ta caminda nos ta biba, pero Aruba ta sinti pa mi famia como nan di dos cas. Y nan a sinja aprecia e cuminda, snacksnan y bolonan traditional manera pastechi, kaasbal, picabal y bolo di cashupete. Den e temporada di Pasco nos ta come banda di cumindanan traditional Hulandes, tambe cumindanan traditional di Aruba/Antiyas. 

Un di mi hobbynan di mas grandi ta musica. Mi ta hopi creativo y mi ta gusta cushina y traha bolo. Tambe mi ta gusta wak series Spanjo of Mexicano ariba Netflix. Nan ta hibami back den tempo caminda mi tabata wak novela Venezolano of Mexicano cu mi wela.

Fuera di esey mi ta gusta lesa y traha speech pa momentonan especial.

Sin limitacion
Boso ta casa na Groningen of Limburg? Of boso tun 'destination wedding' na un otro parti di mundo? Cu mil amor mi ta biaha bai na e luga di boso soño.
Ki bunita ta cu boso mes por dicidi unda boso bruid ta tuma luga? Ariba e orario cu boso mes ta desea? Cu un ceremonia  manera cu boso ta desea? Den e lenguaje cu boso ta desea? Y cu boso mes por dicidi con largo e ceremonia ta dura sin cu boso tin cu tene cuenta cu reglanan prescribi?
Cu un 'zelfstandige trouwambtenaar' esey ta realisabel. Boso ta curioso pa sa con esey ta traha? Mi ta na boso desposishon pa duna boso tur informashon!